700 wapatiwa elimu ya uzazi wa mpango

JUMLA ya wasichana 700 wenye umri kati ya miaka 10 hadi 19 waliokatisha masomo katika shule za msingi na sekondari wilayani Kahama kutokana na sababu mbalimbali ikiwemo kubeba mimba wamejitokeza kupatiwa elimu ya Afya ya  uzazi wa mpango na ujasiriamali  inayotolewa na Shirika la Kiota Women Health Development (KIWOHEDE).

Mkurugenzi wa shirika hilo, Justa Mwaituka alisema idadi hiyo ni wale waliokatisha masomo ambao wametokea katika kata nne za Lunguya, Shilela, Mhongolo na Busoka huku kata 55 za wilaya hiyo hali siyo ya kuridhisha.

Alisema kuwa ili kukabiliana na tatizo hilo, shirika hilo limeanzisha mradi wa miaka miwili ambao utawawezesha wasichana hao kurejea shuleni ikiwemo vyuo vya ufundi na wengine elimu ya upambaji na kompyuta huku wakianza na wanafunzi 24 watakaosoma miezi sita.

Mwaituka alisema pia shirika hilo limeanzisha utaratibu wa kuweka kituo katika kila kata badala ya kuwapeleka wote katika sehemu moja hatua itakayorahisisha upatikanaji wa mafunzo.

“Pamoja na mpango huo, tayari wakufunzi 38 wamepatiwa elimu ya uzazi wa mpango kutoka vijiji 19 vya kata hizo ambao wataenda kutoa elimu hiyo katika vijiji vyao hatua itakayosaidia kupunguza mimba za utotoni na ukatishaji wa masomo,” alisema.

Naye muuguzi mkuu wa hospitali ya wilaya hiyo, Kalidushi Charles alisema tatizo kubwa linalochangia wakazi wengi kuzaa bila mpango ni kutokana na mfumo dume wa wanaume kutohudhuria mafunzo ya uzazi na kuamini kuwa anayepaswa kuhudhuria kliniki ni mwanamke pekee.

Chanzo;Tanzania Daima