BULYANHULU YAGAWA VITABU SHULENI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

MGODI wa madini ya dhahabu Bulyanhulu unaomilikiwa na Kampuni ya African Barrick Gold Mine uliopo katika Kijiji cha Kakola, Kata ya Bulyanhulu wilayani Kahama, umegawa vitabu 898 kwa shule za msingi 10 zilizo katika maeneo ya mgodi huo.

Katika hafla ya ugawaji wa vitabu hivyo uliofanyika katika Shule ya Msingi Kakola juzi, Meneja wa mgodi huo, Peter Burger, alisema wametoa msaada huo ili kutimiza nia yao ya kusaidia kuleta maendeleo kwa wananchi wanaozunguka mgodi huo, hususan katika sekta ya elimu.

Burger alisema ili jamii iweze kuendelea na kukua kiuchumi, ni lazima wananchi wake wawe na elimu ya kutosha ambayo ndiyo mwanga wa maisha yao.

“Mgodi huu licha ya kutoa misaada mbalimbali kwa wananchi na kuwajengea miradi ya maendeleo, hatutatenda haki endapo hatutalipa kipaumbele suala la elimu.

“Asilimia kubwa ya wananchi wanaozungukwa na migodi hawapendi kusoma na wamekuwa wakiomba tuwape ajira migodini bila elimu wala ujuzi wowote hali ambayo inatuwia vigumu,” alisema meneja huyo.

Burger alizitaja shule zilizonufaika na msaada huo kuwa ni Kakola A (vitabu 88), Kakola B (93), Kakola C (93), Bugalama (101), Busindi (84), Ibanza (66), Iyenze (93), Buyange (97), Igwamanoni (99),  Busulwangili (84) vyote vikiwa na thamani ya sh mil. 10.

Ofisa uhusiano wa mgodi huo, Jonh Bosco, alisema Juni mwaka jana, mgodi huo uligawa madawati 1,329 katika shule hizo yenye thamani ya sh milioni 212.6, na kusomesha wanafunzi 900 katika shule za sekondari.

Katika shukrani zake, Kaimu Ofisa Elimu Shule za Msingi Kata ya Bulyanhulu, Alack Mbilinyi, aliuomba uongozi wa mgodi huo kuendelea kusomesha na kutoa msaada wa vitendea kazi vya elimu kwa wananchi bila kuchoka.

Chanzo:Tanzania Daima