MKUU WA MKOA AWAPA SOMO WATUMISHI WAPYA

 

Watumishi wa Serikali wametakiwa kuzingatia sheria, taratibu na maadili ya kazi wakati wa kutimiza majukumu yao.

Wito huo umetolewa na Mkuu wa Mkoa wa Shinyanga Mhe. Ally Nasoro Rufunga alipokutana na waajiriwa wapya wa Sekretarieti ya Mkoa wa Shinyanga ofisini kwake jana.

Mhe. Rufunga amesema ili kuwahudumia wananchi wa Mkoa wa Shinyanga kwa ufanisi watumishi hao walioajiriwa hivi karibuni wanatakiwa kujifunza na kufanya kazi kwa bidii, kuzingatia majukumu ya kazi na ushirikiano bila kuathiri sheria na taratibu za utumishi wa umma.

Amewataka pia kujiendeleza kielimu kwa kutumia fursa mbalimbali zilizopo ili kuinua taaluma zao na kuongeza ufanisi katika kazi zao.

Aidha, Rufunga amewahamasisha watumishi hao kupima Afya kila mara ikiwemo Virusi vya UKIMWI  ili wawe mfano kwa wananchi wanaowahudumia.

Katika hatua nyingine, Mkoa wa Shinyanga umeanza maandalizi ya kupokea na kukimbiza Mwenge wa Uhuru mwaka huu 2014, unaotarajiwa kuwasili mkoani hapa mapema mwezi Oktoba.

Mwenge wa Uhuru mwaka huu utapokelewa kutoka Mkoa wa Geita na utakimbizwa katika Halmashauri sita za Wilaya, ambazo ni Ushetu, Msalala, Halmashauri ya Mji Kahama, Halmashauri ya Wilaya ya Shinyanga, Halmashauri ya Manispaa ya Shinyanga na kumalizia katika Halmashauri ya Wilaya ya Kishapu ambapo utakabidhiwa mkoani Tabora kupitia Wilaya ya Nzega.

Kikao kilichofanyika jana katika ukumbi wa mikutano wa Ofisi ya Mkuu wa Mkoa, Mwenge wa Uhuru unatarajiwa kuona, kuzindua, kufungua na kuweka mawe ya msingi miradi mbalimbali kwa lengo la kuhamasisha shughuli za maendeleo katika maeneo mbalimbali ya Mkoa wa Shinyanga.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.