CCM yaonya viongozi wa kata

CHAMA  Cha Mapinduzi wilayani Kahama kimewaagiza viongozi wa serikali wa kata ya Mapamba kuhakikisha wanasimamia upatikanaji wa fedha zaidi ya Shilingi Laki Tisa zilizopotea ambazo zilikuwa zimechangwa na wananchi kwa ajili ya Ujenzi wa shule ya Sekondari,katika Kata hiyo.

Agizo hili limetolewa jana na Mwenyekiti wa CCM wilaya ya Kahama,Mabala Mlolwa baada ya kuelezwa kuwa ujenzi wa shule hiyo ya sekondari umekwama kutokana na wananchi kugoma kuchanga baada ya fedha za Awali kutokujulikana zilipo.

Kufuatia hali hiyo bwana Mlolwa amewapa majuma matatu kuhakikisha mapato na matumizi ya fedha hizo yanasomwa na fedha zinazodaiwa kupotea zinajulikana zilipo ili ujenzi wa shule hiyo ya Sekondari unaendelea.

Kabla ya hapo Katibu wa UChumi na fedha wa Chama hicho wilaya ya Kaham,Isaya Bukakiye,aliwataka viongozi wakiwemo mabarozi wa chama hicho kuhakikisha wanakuwa mstari wa mbele kusimamia maendeleo ya wananchi hali itakayo kijenga chama.

Ili kuboresha shughuli zao za Chama;Bwana Bukakiye aliahidi kuwapatia baiskeli mabalozi wote wa wilaya ya Kahama,ili waweze kufanya kazi zao kwa urahisi zaidi ili waondokane na hali ya ,madai ya kutumika kwenye Chama wakati wa uchaguzi pekee na ukiisha wanasahaulika.