Mgodi wa Bulyanhulu kulipa fidia ya bil 1250 kwa wanakijiji Kakola

MGODI wa dhahabu wa Bulyanhulu unaomilikiwa na Kampuni ya African Barrick Gold Mines Ltd, unatarajia kulipa kiasi cha Shilingi Bilioni 1,250 kwa wakazi wa Kijiji cha Kakola namba Tisa waliopisha mgodi huo kuongeza eneo la uwekezaji.

Mkuu wa wilaya ya Kahama;Bwana Bensoni Mpesya,amesema hayo juzi katika mkutano wa hadhara uliofanyika kijiji hicho kilichopo  kata ya Bulyanhulu,ambapo  kiasi hicho ni kwa ajili ya wakazi 143 ambao wameridhia kuacha maeneo na mashamba yao ili  kampuni hiyo iongeze eneo la uchimbaji madini.

Bwana Mpesya amesema kiasi hicho cha fedha ni pamoja na faini ya asilimia nane ambazo Serikali ya wilaya iliafikiana na mgodi uwafidie wakazi hao kutokana na kuwacheleweshea stahiki zao.

Hivi karibuni baadhi ya wakazi hao walizuia upanuzi wa ujenzi wa uzio wa Mgodi wa dhahabu wa Bulyanhulu katika  Kijiji cha Namba Tisa, katika maeneo waliyompisha Mwekezajni huyo,kutokana na kucheleweshewa malipo hayo, ambapo mgogoro huo umetatuliwa na Mkuu wa wilaya ya Kahama.