Polisi yawazawadia waliokamata SMG

JESHI la Polisi mkoani Shinyanga limetoa zawadi kwa wananchi pamoja na Sungungu katika kata za Segese na Lunguya, wilayani Kahama baada ya kufanikisha kukamatwa kwa watu watatu wanaosadikiwa kuwa ni majambazi yakiwa na silaha aina ya SMG na risasi 26.

Kaimu Kamanda wa polisi mkoa wa Shinyanga, Kamishna Msaidizi, Kihenya Kihenya, alisema jana kuwa Sungusungu na wananchi hao walifanikisha kukamatwa kwa watuhumiwa watatu ambao wanasadikiwa kufanya uhalifu wa kuvamia maduka matatu na kufanikiwa kupora sh 180,000 na vocha za simu.

Kihenya alisema watuhumiwa hao waliteka maduka hayo saa mbili usiku na baada ya kufanya uhalifu huo walitoweka na kuelekea katika kijiji cha Segese, lakini wananchi hao kwa kushirikiana na Sungusungu pamoja na polisi walifanikiwa kuwakamata.

Alisema wananchi walikamata bunduki hiyo na risasi hizo nyumbani kwa mtuhumiwa, Amoni Lubisi (24) ikiwa imehifadhiwa kitandani chini ya godoro pamoja na risasi zake.

Pia wananchi hao waliwakamata watuhumiwa wote watatu: Amoni Lubisi na kaka yake Silasi Lubisi (25) pamoja na Bakari Ramadhan (32) wote wakiwa wakazi wa Segese kilometa chache kufika Lunguya eneo walilokwenda kufanya uhalifu huo.

Polisi Shinyanga imetoa sh 100,000 iliyokabidhiwa kwenye kata hizo mbili na Kamanda Kihenya ambapo Kamishina Msaidizi Mwandamizi kutoka Makao Makuu ya Upelelezi wa Jeshi hilo nchini alitoa sh 50,000 pamoja na Kamishna Msaidizi kutoka Makao Makuu hayo, Mohamed Salim naye alitoa sh 80,000.

Naye Mkuu wa Polisi Wilaya ya Kahama, Mrakibu Mwandamizi William Mlekwa, alitoa sh 50,000 huku akiwataka wananchi hao kutekeleza falsafa mpya ya Polisi ya ‘Familia Yetu Haina Mhalifu’ hali itakayosaidia kutokomeza uhalifu na mauaji ya vikongwe

Chanzo;Tanzania daima