ULIPUAJI MIAMBA MARUFUKU USIKU

Kaliua. Wachimbaji wa madini katika Kijiji cha Nsungwa kwenye machimbo ya dhahabu wamepigwa marufuku kulipua miamba kwa kutumia baruti wakati wa usiku.

Akizungumza kwenye kikao na wachimbaji wa madini, Makamu Mwenyekiti wa Halmashauri ya Wilaya ya Kaliua, Ibrahim Kifoka alisema ulipuaji miamba wakati wa usiku ni kinyume cha sheria kwa vile sheria imeweka mwisho kuwa saa kumi na mbili jioni.

“Ulipuaji miamba kwa mujibu wa sheria mwisho ni majira ya saa kumi na mbili jioni na sio baada ya muda huo,” alisema.

Alieleza kwamba hatua hiyo imetokana na malalamiko ya wananchi kuwa baadhi ya wachimbaji wamekuwa wakilipua miamba kwa ajili ya madini hadi usiku wa manane jambo ambalo halikubaliki. Aliweka bayana kuwa ulipuaji huo nyakati za usiku,umesababisha watu kupata shinikizo la moyo na kushindwa kulala hali amabayo imekuwa ikiwaletea usumbufu mkubwa.

Awali wachimbaji wadogo walieleza kilio chao kuwa wamekuwa wakitakiwa kutoa mgawo kwa wamiliki wawili wa machimbo ya dhahabu badala ya mmoja.

Walieleza kuwa wamiliki hao Seleman Mihambo na Mohamed Lasweed, wamekuwa wakidaiwa mgawo wa machimbo yao kutoka kwa wachimbaji wadogo, ambao wamekuwa hawajui wampe nani..

Akitolea uamuzi jambo hilo, Kifoka aliwataka wamiliki hao wasichukue mgawo kutoka kwa wachimbaji hadi maofisa wa madini toka Tabora watakapotatua tatizo hilo.

Ili kuwa na usalama kwenye eneo hilo,iliamuliwa katika kikao hicho kuchaguliwa wakaguzi wa usalama ambapo walichaguliwa Omary Salum na Jaffary Mtima.

Machimbo ya Madini ya Dhahabu ya Nsungwa katika Kata ya Silambo wilayani Kaliua yanatoa dhahabu ambapo wachimbaji wadogo wanatumia eneo hilo kuchimba dhahabu huku wakitoa mgao kwa wamiliki wa eneo hilo.
Chanzo:Mwananchi