'WANAUME WAOGA KUPIMA UKIMWI'

IMEELEZWA wanaume wanaongoza kwa kutopima virusi vya ukimwi (VVU) kutokana na kutawaliwa na hofu inayosababishwa na kumiliki ‘nyumba ndogo’ nyingi huku wakiwa wahamasishaji wazuri kwa wake na wapenzi wao kutambua afya zao.

Hayo yalielezwa na Mkufunzi Mkuu wa Kitengo cha Ukimwi kutoka hospitali ya mji wa Kahama, Ofisa Muuguzi, Emerenciana Machibya, katika semina ya kujitambua na kupata elimu ya ugonjwa huo iliyowahusisha wanaume kutoka migodini na madereva wa magari makubwa wilayani Kahama.

Katika semina hiyo iliyoendeshwa na shirika lisilo la kiserikali la The Foundation for Human Healthy Society (Huheso Foundation) la wilayani Kahama, Machibya alisema wanaume  wengi  hawapendi kutambua afya zao kwa kupima na badala yake huwasukuma wake zao kwenda  hospitali peke yao kama chambo.

“Kinababa wa ajabu sana, kwani hushindwa kuwasindikiza wake zao kliniki wanapokuwa wajawazito, hubakia wakisikilizia majibu ya vipimo kutoka kwa wake zao ambao pindi wakiwa hawana virusi basi nao hujiaminisha kuwa wapo salama, jambo ambalo si kweli,” alisema Machibya.

Alisema pamoja na tafiti kuonyesha wanawake ndio wanaongoza kwa kujitokeza kupima, lakini pia wanaongoza katika maambukizi, ambapo alisisitiza umuhimu kwa jamii kuchunguza afya zao mara kwa mara.

Ofisa Muuguzi Mkuu katika Halmashauri ya Mji, Richard Kajogo, aliwataka wanaume kuwa jasiri kwa kujitokeza kupima, ili wanapogundulika wapate huduma za afya.

Mkurugenzi wa Huheso Foundation, Juma Mwesigwa ambaye shirika lake limefadhiliwa na RFE ya jijini Dar es Salaam kutekeleza mradi wa kuwakomboa wanawake na wasichana katika biashara ya ngono, alisema ili kukabiliana na janga hilo ni vema wanaume kuondokana na mfumo dume wa maisha

Chanzo:Tanzania Daima