WAGANGA WAZUA TAHARUKI SHINYANGA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

CHAMA Cha Mapinduzi (CCM), mkoani Shinyanga kimeshitushwa na taarifa za kuibuka kwa kundi la waganga wa jadi maarufu kwa jina la ‘Lambalamba’ au ‘Kamchape’ wanaopita vijijini wakiwachangisha wananchi fedha kwa nguvu wakidai ni malipo ya kazi ya kuwafichua wachawi katika maeneo yao.

Akizungumza na waandishi wa habari ofisini kwake mwishoni mwa wiki, Mwenyekiti wa CCM Mkoa wa Shinyanga, Khamis Mgeja, alisema kuzuka kwa kundi hilo kunaweza kusababisha kuendelea kwa matukio ya mauaji ya kikatili dhidi ya vikongwe na watu wenye ulemavu wa ngozi (albinism), kutokana na imani za kishirikina.

Mgeja, alisema ni muhimu kwa viongozi wa serikali mkoani hapa kuhakikisha wanawasaka na kuwakamata wafuasi wa kundi hilo, ambalo tayari limesababisha matatizo kwa wakazi wa Shinyanga vijijini huku baadhi yao wakinyang’anywa kwa nguvu mifugo na fedha zao na kwamba, serikali ya CCM haipaswi kufumbia macho vitendo hivyo.

"Ni lazima watendaji wetu ndani ya serikali muhakikishe mkoa wetu unaondokana na aibu hii, mauaji haya ya kikatili yanachangia kwa kiasi kikubwa kupoteza sifa ya mkoa…kundi hili lazima litokomezwe kwa wahusika wote kukamatwa na kufikishwa katika vyombo ya dola, wananchi sote tushirikiane kuwafichua, tuchukie, tulaani na tukomeshe aibu hii Shinyanga," alieleza Mgeja.

Kwa mujibu wa taarifa iliyotolewa na Mkuu wa Wilaya ya Shinyanga, Annarose Nyamubi wakati wa kikao cha majumuisho ya ziara ya mwenyekiti huyo wa CCM kukagua utekelezwaji wa ilani ya uchaguzi ya chama hicho, kundi hilo linadaiwa kuingia hivi karibuni Shinyanga vijijini likiwalazimisha wanavijiji kutoa fedha ili wafichuliwe wachawi na watu wanaofuga ‘misukule.’

Akifafanua, mkuu huyo wa wilaya alisema watu hao wanawalazimisha wanavijiji kila kaya itoe sh 5,000 kama gharama za kazi ya kuwasaka wachawi katika vijiji vyao pamoja na kuwarejesha watu waliogeuzwa na wachawi hao kuwa misukule, hali ambayo imesababisha mtafaruku mkubwa miongoni mwa wananchi.

Nyamubi, alisema tayari lambalamba wanne wamekamatwa (majina yamehifadhiwa), wakiwa na majina ya kaya 299 ambazo zilitakiwa kulipa fedha hizo na katika mahojiano ya awali walisema walipewa vibali na mtumishi mmoja wa manispaa ambaye pia ameagiza akamatwe na kuwekwa ndani.

 Chanzo;Tanzania Daima