Maadhimisho ya Siku ya Ukimwi Mkoani Shinyanga .

 

Mkuu wa Mkoa akizungumza na wananchi waliohudhuria maadhimisho hayo kijijini Lunguya

 Watoto wanaohudumiwa na shirika la Compassion wakitoa burudani ya nyimbo zenye ujumbe wa UKIMWI katika maadhimisho ya siku ya UKIMWI  duniani katika viwanja vya shule ya msingi Lunguya katika kijiji cha Lungua wilaya ya Kahama

 Baadhi ya wananchi na wadau mbalimbali wakifuatilia kwa makini burudani zilizokuwa zikiendelea katika maadhimisho ya siku ya UKIMWI yaliyofanyika jana kimkoa wilayani Kahama mkoani Shinyanga

 Mhe. Mkuu wa Mkoa wa Shinyanga Ally N. Rufunga akielekea kukagua mabanda ya wadau wa UKIMWI katika kijiji cha Lunguya wilaya ya Kahama ambako maadhimisho ya siku ya UKIMWI yalifanyika kimkoa,akiwa ameambatana na Mganga Mkuu wa Mkoa Dkt. Ntuli Kapologwe

Mkuu wa Mkoa wa Shinyanga Ally N. Rufunga akikagua na kupata maelezo kwenye baadhi ya mabanda ya wadau wanaoshirikiana na serikali katika kusaidia kupunguza maambukizi ya VVU mkoani Shinyanga

Walemavu wa viungo wakitoa burudani mbele ya Mgeni rasmi Mhe. Mkuu wa Mkoa wa Shinyanga katika maadhimisho hayo

Wasichana wanaosaidiwa na shirika la Kiwohede wakitoa burudani mbele ya mgeni rasmi Mhe. Mkuu wa Mkoa wa Shinyanga katika maadhimisho hayo

Watoto wa shule ya Msingi Lunguya wakionesha vipaji vyao katika bunge la watoto kwenye maadhimisho ya siku ya UKIMWI duniani 

 Mgeni rasmi Mhe. Mkuu wa Mkoa wa Shinyanga akifuatilia burudani na matukio mbalimbali katika siku ya maadhimisho ya UKIMWI katika kijiji cha Lunguya, wilaya ya Kahama,kushoto kwake ni Mkuu wa wilaya ya Kahama Mhe. Benson Mpesya, kulia kwake ni Katibu Tawala wa Mkoa wa Shinyanga Dkt. Anselm Tarimo, Mganga Mkuu wa Mkoa Dkt. Ntuli Kapologwe

Wananchi wa wilaya ya Kahama waliodhuria sherehe hizo wakimsikiliza Mhe. Mkuu wa Mkoa

 

Mkuu wa Mkoa wa Shinyanga Mhe. Ally N. Rufunga amewaasa wananchi kuitumia siku ya UKIMWI duniani kuwa siku ya kuwakumbuka watu wanaoishi na Virusi Vya Ukimwi na kutafakari juu ya mbinu bora za kuwahudumia na kuwaondolea unyanyapaa pamoja na kuwakumbuka yatima ambao wamefiwa na wazazi kutokana na maradhi yanayohusiana na UKIMWI.

Mhe. Rufunga amesema hayo jana, katika maadhimisho ya siku ya UKIMWI duniani yaliyofanyika kimkoa wilayani Kahama katika Halmashauri ya Msalala kijiji cha Lunguya.

Rufunga amesema hali ya ugonjwa wa UKIMWI mkoani hapa bado ni mbaya kwani ushamiri wa maambukizi uko juu ya kiwango cha Taifa cha asilimia 5.1 kutokana na tafiti za kisayansi za mwaka 2011 hadi 2012, kwa mujibu wa tafiti hizo mkoa wa Shinyanga una ushamiri wa maambukizi asilimia 7.4.

Aidha, takwimu za ndani ya mkoa zilizotokana na huduma zote za upimaji wa VVU  kwa kipindi cha Januari hadi Oktoba, mwaka huu 2014, zinaonesha ushamiri wa maambukizi ni asilimia 5.01 sawa na pungufu ya asilimia 0.89 kutoka 5.9 ya mwaka 2013 hivyo ametoa rai kwa wananchi wote kupima na iwapo watagundulika wana maambukizi watembelee vituo vya afya ili kuendelea kupata huduma za matunzo na tiba.

Hadi kufikia mwezi Oktoba 2014 Mkoa umesajili zaidi ya watu elfu 58 wanaoishi na virusi vya UKIMWI na kati yao watu 22,231 wanaendelea kutumia dawa za kufubaza virusi vya UKIMWI.

 

Na Magdalena Nkulu

Ofisi ya Mkuu wa Mkoa

Shinyanga

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.