‘Ukosefu wa hosteli chanzo cha mimba shuleni’

IMEELEZWA kuwa kukosekana kwa hosteli kwenye shule za sekondari wilayani Kahama na vijana kutopata elimu ya afya ya uzazi ni chanzo cha wasichana wengi kukatisha masomo kwa sababu za ujauzito.

Hayo yalielezwa na Kaimu Ofisa Elimu wa Halmashauri ya Mji wa Kahama, Perpetua Maige, wakati wa mkutano wa uhamasishaji wa Afya ya Uzazi kwa vijana iliyohusisha walezi, viongozi wa mkoa na Halmashauri ya Mji wa Msalala za wilayani Kahama, iliyofanyika mjini Shinyanga.

Maige alisema tatizo hilo ni kubwa maeneo ya vijijini kutokana na wanafunzi wa kike kulazimika kupanga mitaani huku ikiwalazimu kutembea mwendo mrefu kwenda shuleni, kitendo ambacho huwaingiza majaribuni kwa kutongozwa na wanaume.

“Kutokana na mazingira magumu ya kujisomea hasa kwa mtoto wa kike imesababisha kwa mwaka huu hadi kufikia mwezi huu tayari mabinti 22 wameacha shule baada ya kubainika ni wajawazito, hiyo ni kwa watoto walio shule za halmashauri ya mji,” alisema Maige.

Aidha, kwa upande wake mwakilishi kutoka Wizara ya Afya na Ustawi wa Jamii, Dk. Issac Njalu, akiwasilisha mada za afya ya uzazi kwa vijana, katika mkutano huo uliofadhiliwa na UNFPA alisema wasichana wengi huingia katika matendo ya ngono pasipo kujiamini.

Alisema hilo ni janga kwa mikoa ya Kanda ya Ziwa kwa watoto wa kike kukatisha masomo kwa kupachikwa mimba ama kutopata elimu kutokana na kuozeshwa katika umri mdogo.

Njalu alisema kuwa ndoa za utotoni hutokea miongoni mwa wasichana ambao hawajaelimika na kutofikiwa na taarifa mbalimbali za afya ya uzazi wa mpango, hasa kwa maeneo ya vijijini, ambapo wanajiingiza katika masuala ya ngono kwa kutojiamini na mikakati ya makubaliano inakuwa haifanyiki.

Chanzo: Tanzania Daima