Wakulima wa tumbaku wamwangukia JK

WAKULIMA wa tumbaku wilayani Kahama ‘Kitumbaku Mkoa’ wameendelea kumwangukia Rais Jakaya Kikwete kutosaini sheria ya ushirika 2013 yenye lengo la kukifuta Chama Kilele (Apex) cha wakulima wa zao hilo nchini, kwa madai kuwa kufanya hivyo ni kuwatia ufukara.

Mkulima, Shija Malambo wa Kijiji cha Bulungwa na Maliseli Kazimoto wa Bulowa, kwa nyakati tofauti walimsihii Rais Kikwete kutosaini sheria hiyo na kumuomba akutane nao.

Walisema kuwa endapo rais atasaini na kuifuta Apex, zao hilo litakufa kama ilivyo kwa kahawa, pamba na korosho.

“Kahawa na pamba yakiwa na Apex zao yalikuwa kinara kuliingizia taifa fedha za kigeni, serikali ilipozifuta Apex, mazao yamekuwa mzigo kwa mkulima na serikali na mapato yake yameshuka maradufu, tunamuomba Rais Kikwete aendeleze busara zake kama alivyofanya kwenye suala la Katiba atuokoe walalahoi,” alisema Kazimoto.

Wakionesha kushangazwa na wabunge na serikali kung’ang’ania Apex ifutwe, wakulima hao walimkumbusha Rais Kikwete kuwa mbali na vyama vyao ikiwemo Apex kuwapo kisheria pia ni vyama vya hiari vilivyowekwa na wakulima kuwaongezea nguvu ya utetezi wa matatizo na changamoto za uzalishaji na masoko.

Walisema walishangazwa na Waziri Christopher Chiza na Mkurugenzi Mkuu wa Bodi ya Tumbaku nchini, Wilfred Mushi, kuwa Apex ni ya wahuni wenye nia ya kuwaibia wakulima na kumuomba rais awaite na kuwauliza vizuri, vinginevyo wawajibishwe kwa uchochezi.

Kwa mujibu wa Makamu Mwenyekiti wa Chama Kikuu cha Ushirika ‘Mkoa wa Kahama’ Kitumbaku  KACU Ltd, Emanuel Peter, alisema mbali na wakulima kuwa na madai hayo tayari imeundwa kamati ya kuonana na rais juu ya jambo hilo ambayo inakwamishwa na watendaji wake wa karibu