Lowassa, Mgeja wachangisha mil. 9.2/-

WAZIRI Mkuu mstaafu, Edward Lowossa na Mwenyekiti wa Chama Cha Mapinduzi (CCM) mkoani Mwanza, Khamis Mgeja, wamechangisha sh milioni 9.2 katika harambee ya kuchangia ujenzi wa Kituo Kidogo cha Polisi cha Kata ya Didia, wilayani Shinyanga, mkoani hapa.   Katika harambee hiyo, Mgeja na marafiki zake walichangia sh 5,830,000, huku Lowassa akichangia mifuko 100 ya saruji pamoja na fedha taslimu sh 300,000. Kwa upande wao wakazi wa kata hiyo walichanga sh 3,559,500, hivyo kuvuka lengo la kukusanya sh 8,300,000 zilizokusudiwa kwa ajili ya ujenzi wa kituo hicho cha polisi.  Akizungumza katika harambee hiyo, Mgeja mbali ya kuwapongeza wakazi wa kata hiyo kwa uamuzi wao wa busara, pia aliziagiza halmashauri za wilaya, miji, manispaa na majiji nchini kuweka utaratibu wa kutenga bajeti katika halmashauri zao kwa ajili ya shughuli za ulinzi na usalama. Mgeja alisema suala la ulinzi na usalama ni sera ya CCM na limeainishwa wazi ndani ya Ilani yake ya Uchaguzi ya mwaka 2010-2015, hivyo kuna kila sababu ya kuhakikisha utekelezaji wake unafanikiwa.  “Wakumbuke kuwa suala la ulinzi na usalama wa mali za wananchi wao limo mikononi mwao, wananchi hawa wanapaswa kuhakikishiwa ulinzi katika maeneo yao pale wanapotekeleza shughuli zao mbalimbali za maendeleo ikiwamo shughuli za kibiashara na uwekezaji kwa wawekezaji kutoka nje ama ndani ya nchi,”  alieleza Mgeja. CHANZO;TANZANIA DAIMA