Makada CCM wakerwa kuitwa makarai

WAJUMBE wa Halmashuari za CCM wa kata mbalimbali wilayani Kahama wamedai sababu ya wao kuitwa makarai na wanasiasa wa upinzani inasababishwa na viongozi wa chama chao kuwatelekeza mara baada ya uchaguzi.  Makada hao ambao walionyesha kukerwa na kauli za wanasiasa hasa wa upinzani za kuwaita makarai ambayo hutumika wakati wa ujenzi na kazi ikiisha husahaulika, walitoa kauli hiyo mbele ya Katibu wa Siasa na Uchumi wa CCM Wilaya ya Kahama, Isaya Bukakiye kutokana na kukithiri kwa umaskini miongoni mwao. Walidai kuitwa makarai ni kauli inayowadhalilisha hasa kutokana na wengi wao kuwa maskini baada ya uchaguzi kumalizika huku wakiwa wamejitoa kwa nguvu kubwa kuhakikisha viongozi wa chama chao wameshinda, ambao baadaye hujineemesha wenyewe na kuwaacha wapiga kura. Katika madai hayo, waliiomba CCM kuwajengea uwezo kwa kuimarisha vikundi vyao ujasiriamali, jambo ambalo litawasaidia kujikwamua kiuchumi na kuwazidishia ari ya kukipigania chama chao kuliko ilivyo sasa.  Akizungumzia madai hayo, Katibu wa Siasa na Uchumi wa CCM Wilaya ya Kahama, Bukakiye, alisema ili kujikwamua na umaskini lazima waimarishe vikundi na kwa kuanzia alitoa sh 500,000 kwa kikundi cha kina mama cha Isanga. Aidha, katika Kijiji cha Itumbo aliwachangia mifuko ya saruji 100 kwa ajili ya ujenzi wa zahanati ambapo kikundi cha vijana wajasiriamali wa Ukune aliwachangia kuku ishirini wa mayai pamoja na shilingi laki tatu. Ili kuondokana na kuitwa makarai aliwashauri Wana CCM kufanya kazi kwa bidii kuliko kusubiri msimu wa uchaguzi kuomba fedha kutoka kwa wagombea, hali ambayo alidai haiwezi kuwasaidia kujikwamua kiuchumi. Chanzo;Tanzania Daima