SHIBUDA AVUNJA UKIMYA

Mbunge wa Maswa Magharibi, mkoani Simiyu kwa tiketi ya Chama cha Demokrasia na Maendeleo (CHADEMA), Bw. John Shibuda, amewaomba viongozi wa vyama vya siasa nchini
kuacha ubinafsi badala yake wajali masilahi ya umma.

Bw. Shibuda aliyasema hayo juzi Mjini Shinyanga wakati akizungumza na waandishi wa habari siku chache baada ya kufukuzwa kwenye kikao cha viongozi wa CHADEMA,Kanda ya Ziwa Mashariki, akidaiwa kukisaliti chama.

Alisema tabia ya baadhi ya viongozi wakuu wa vyama vya siasa kutanguliza mbele masilahi binafsi, imechangia kutokea mgawanyiko ndani ya vyama hivyo na kuua demokrasia.

Aliongeza kuwa, baadhi ya viongozi wa upinzani wamekuwa wakifanya kila mbinu kwa lengo la kuwagawa wanachama ili kujijengea mazingira ya kuendelea kukaa madarakani hata kama sehemu kubwa ya wanachama imewachoka.

"Viongozi wanachangia migogoro ndani ya vyama vya siasa kwa mfano, hivi sasa ndani ya CHADEMA lipo tatizo...viongozi wetu wanafanya kila juhudi kujijengea mazingira ya kubaki madarakani miaka yote.

"Suala hili halipo CHADEMA peke yake, karibu vyama vyotevya siasa hata ndani ya Chama Cha Mapinduzi (CCM), ambako makundi yamemeshamiri sana, leo hii viongozi wanasahau jukumu lao la kuwatumikia wananchi badala yake wanlumbana wao kwa wao," alisema.

Aliwapa pole viongozi wa kisiasa ambao wanaoendekeza sera ya makundi ndani ya vyama vyao, kutunga hoja chafu ili wanachama
wawachukie baadhi ya watu ndani ya chama na kuonekana wasaliti.

"Niwathibitishie wazi kuwa, daima paka na panya hawawezi kukaa chumba kimoja na haki ya dhuluma haviwezi kukaa pamoja, lazima viongozi tuwajibike kwa wananchi," alisema Bw. Shibuda.

Bw. Shibuda alisema baada ya kufukuzwa ndani ya kikao cha CHADEMA, dhamira yake ni kwenda kuwaeleza wananchi jimboni kwake ukweli wote ili waelewe kwanini anaonekana msaliti katika chama hicho na daiwa ataendelea kusimamia ukweli.

"Daima nitasimamia ukweli, nitawaeleza wananchi wangu ukweli wote na wao ndio wataamua kama utetezi ninaoufanya kwa ajili
ya wakulima na wafugaji jimboni ni usaliti, nitagombana na yeyote anayetaka kuharibu masilahi ya umma," alisema.

chanzo;majira