Kiwohede yaendeleza watoto wa kike

WAZAZI wametakiwa kushirikiana na mashirika ya kijamii yanayoendesha miradi mbalimbali ikiwemo ya kuwaendeleza watoto wa kike walioacha masomo kwa kuhakikisha wanawaruhusu kushiriki kwenye miradi itakayowakwamua kimaisha.

Rai hiyo ilitolewa na Makamu Mweyekiti wa Halmashauri ya Msalala wilayani Kahama, Shinyanga, Benedict Manwari, katika kikao kilichoandaliwa na shirika lisilokuwa la kiserikali la Kiota Women Health Development (Kiwohede) na kuhudhuriwa na wazazi pamoja na viongozi wa kata ya Lunguya.

Manwari alisema jamii imekuwa haiamini mashirika yanayoendesha miradi yake hali inayosababisha baadhi yao kushindwa kuwaruhusu watoto wao kujiunga na kushiriki.

Pia aliwataka wazazi kushirikiana na mashirika hayo ikiwemo shirika la Kiwohede ambalo linaendesha mradi wa afya ya uzazi na kuwajengea uwezo wa kujiajiri na kuwa wajasiriamali wasichana wenye umri kati ya miaka 10 hadi 19 ambao walikatisha masomo kutokana na kuolewa katika umri mdogo na kupata mimba za utotoni.

Mkurugenzi wa Kiwohede, Justa Mwaituka, alisema shirika hilo limelenga kuwasaidia wasichana hao kwa kuhakikisha wanarudishwa shule kwa wale watakaohitaji na wengine kuwapatia mafunzo ya ufundi stadi wa fani mbalimbali ili kuwajengea uwezo wa kujitegemea.

Mwaituka alisema malengo ya mradi huo ni kuwezesha wasichana 60 katika fani mbalimbali ambapo shirika limelenga kuwafikia wasichana wengi katika kata za Lunguya, Shilela, Busoka na Mhongolo watakaopata mafunzo kupitia vituo vilivyotengwa.

Alisema kwa awamu ya kwanza wasichana 60 watapelekwa katika Chuo cha Maarifa ya Nyumbani cha Mwanva ambao watasoma kulingana na fani watakayoichagua kwa kulipiwa gharama zote na Kiwohede kwa miezi sita.

Chanzo;Tanzania daima