Tumbaku tishio kwa mazingira

IMEELEZWA sababu ya kutishia kuibuka kwa ukame katika maeneo yaliyokuwa tegemeo kwa kilimo wilayani Kahama, ni udhaifu wa kusimamia sheria ya misitu pamoja na kilimo cha zao la tumbaku.

Mkuu wa Wilaya ya Kahama, Benson Mpesya, alibainisha hayo juzi wakati wa uzinduzi wa kampeni ya upandaji miti katika Halmashauri ya Ushetu iliyofanyika kijiji cha Kangeme, Kata ya Ulowa.

Alisema udhaifu huo unatokana na wanaohusika kufanya kazi kwa mazoea kiasi cha kushindwa kusimamia sheria huku wanaohusika na zao la tumbaku nao wakishindwa kuwajibika ipasavyo katika kutoa elimu juu ya umuhimu wa upandaji miti.

Mpesya alisema ni wajibu wa Halmashauri ya Ushetu kutambua athari inayoweza kusababisha kuibuka kwa ukame kwa kuwahamasisha wakulima wa zao hilo kuona umuhimu wa kupanda miti huku ikisimamia sheria kwa atakayeharibu miche na miti itakayopandwa.

Mkuu huyo wa wilaya alisema uoto wa asili uliokuwepo katika miaka ishirini iliyopita katika eneo la Halmashauri ya Ushetu imeathiriwa kwa kiwango kikubwa na wakulima wa zao la tumbaku kwa kukata magogo ya miti ya kukaushia zao hilo.

“Leo hii tunajivunia kula matunda yaliyopandwa na wazee wetu miaka mia moja iliyopita… sisi tunakata miti pasipo kuwaandalia kizazi kijacho urithi wa miti,” alisema Mpesya.

Mkurugenzi Mtendaji wa Halmashauri ya Ushetu, Isabela Chilumba, alisema zao la tumbaku ni muhimu kwa ustawi wa halmashauri hiyo, na kilimo hicho kuwa endelevu kunategemea uwepo wa misitu ya kutosha, na kwa kutambua hilo ndiyo maana wameanzisha kampeni hiyo itakayofanyika kila mwaka maeneo yote ya Ushetu.

Chanzo;Tanzania Daima