WALIOBEBA MIMBA WAKIWA NA UMRI MDOGO WAPEWA MAFUNZO YA AFYA NA UZAZI

JUMLA ya wasichana 60 wenye umri kati ya miaka 10 hadi 19 waliojifungua na wengine kupata mimba wakiwa mashuleni Wilayani Kahama Mkoani Shinyanga wameanza kupatiwa mafunzo ya Afya ya uzazi hali itakayowafanya kupata elimu ya kujikinga na mimba za utotoni . Katika mafunzo hayo yanayofanywa na shirika la Kiota Women Health and Development wasichana hao wametoka katika kata Nne za Shilela Lunguya,Busoka na Mhongolo baada ya kumaliza mafunzo hayo watapatiwa elimu kwa mfumo usio rasmi kama vile MMEMKWA kwa wale wa shule za msingi . Mratibu wa Mafunzo hayo kutoka shirika hilo Emmanueli Yohana amesema kwa wale waliokatisha masomo ya sekondari watapatiwa elimu hiyo kwa mfumo wa QT pamoja na vyuo vya ufundi hali ambayo itawakwamua katika maisha yao . Hata hivyo Yohana amesema tayari wanafunzi hao wamepewa fomu za kujaza ili kushiriki mafunzo hayo ingawa idadi hiyo ni ndogo ukilinganisha na idadi kubwa zaidi ya wasichana chini ya umri huo waliokatisha masomo yao kwa kupata ujauzito wakiwa shuleni. Nae Mkurugenzi wa shirika hilo Justa Mwaituka amesema kuwa mradi huo ni wa miaka miwili ambao utasaidia wasichana hao kujiepusha na umasikini kwa kuwa tayari watakuwa wamejifunza stadi za maisha na kutoa elimu ya madhara ya mimba za utotoni kwa wenzao walioko mashuleni. Kwa upande wake mganga mkuu wa Halmashauri ya Msalala wilayani kahama Hamad Nyambea amewaonya vikali wazazi kwa kitendo cha kuto chukua hatua kwa wanaume wanaowapa mimba watoto hao .