CHAMA cha Demokrasia na Maendeleo (CHADEMA) kimesema kutokana na
uongozi mbovu na sera zisizomlinda Mtanzania, uwekezaji katika madini
umegubikwa na uporaji mkubwa wa rasilimali na tayari nchi imeanza
kuachiwa mashimo.
Chama hicho kimesema kuna njia mbili pekee za kuwanusuru Watanzania,
pamoja na kuliokoa taifa kuondokana na ufisadi na uporaji wa rasilimali
za nchi, ambayo ni wananchi kuwabana wabunge na wajumbe wa Bunge
Maalumu la Katiba kuhakikisha Katiba mpya inakuwa na ibara
inayozingatia haki za wananchi kumiliki na kunufaika na rasilimali.
Akizungumza katika mfululizo wa mikutano ya Mpango wa M4C- Operesheni
Pamoja Daima katika maeneo mbalimbali ya Mkoa wa Shinyanga juzi na
jana katika maeneo ya Msalala (Kakola), Kahama mjini, Shinyanga mjini,
Iselamagazi, Kishapu, Mhunze, Itilima (Lugulu), Mkurugenzi wa
Mawasiliano na Mahusiano wa CHADEMA, John Mnyika, alisema mgodi wa
Bulyag’hulu ulianza uzalishaji mwaka 2001 na tayari hadi sasa umetoa
tani za ‘ounce’ (toz) milioni 3.29 huku serikali ikiwa imelipwa sh
bilioni 337 pekee.
Alisema Watanzania wanashindwa kunufaika na rasilimali zao kwa sababu
ya katiba, sheria na mikataba mibovu iliyoingiwa chini ya CCM kama
chama kilichoko madarakani kwa sasa.
Akiwa Shinyanga mjini, Mnyika ambaye pia ni Waziri Kivuli wa Nishati
na Madini, alikumbusha kwamba ilani ya uchaguzi ya CHADEMA ya mwaka
2005 iliweka mkazo katika kutetea rasilimali za nchi ikiwemo madini,
kashfa za Richmond, Buzwagi na EPA zilipoibuka bungeni CHADEMA ilikodi
helikopta na kuwazungusha viongozi wa vyama na wabunge, kupeleka hoja
kwa wananchi.
“Operesheni hiyo ilianzia kwa mapokezi Dar es Salaam na iliishia
Septemba 15, 2007 Mwembeyanga ambapo orodha ya mafisadi ilisomwa. Hatua
hiyo ilimsukuma Rais Kikwete kuunda Kamati ya Bomani kuhusu madini,
Kamati ya IGP kuhusu EPA na Bunge likaunda Kamati Teule kuhusu
Richmond.
“Sasa tunawashangaa wanafiki na wasaliti ambao wanafanya mikutano ya
hadhara kubeza hatua hiyo ya CHADEMA ya wakati huo ambayo ilifungua
ukurasa mpya katika mapambano dhidi ya ufisadi na utetezi wa rasilimali
nchini.
“Kwa hiyo mbinu ya kwanza ni hiyo kuwabana kabisa wabunge na wajumbe
wa Bunge la Katiba, ili kifungu cha haki za rasilimali kiingizwe kwenye
Katiba Mpya. Mbinu ya pili ni kuiondoa serikali madarakani na
kuichagua CHADEMA katika chaguzi zote zinazokuja, ili kupata uongozi
bora na sera sahihi, masuala ambayo hayawezi kutekelezwa na CCM
iliyoshiriki kuingia mikataba mibovu,” alisema Mnyika.
Kwa upande wa Mgodi wa Buzwagi, Mnyika alisema tayari kuna kasi kubwa
ya uchimbaji wa dhahabu ambapo tangu mwaka 2009 hadi sasa tani za
aunzi (toz) milioni moja za madini huku mapato kwa serikali yakiwa ni
sh bilioni 74 pekee, ambapo pia sehemu kubwa ikiwa ni makato ya
wafanyakazi wanaokatwa kodi lukuki.
Mnyika alisema mgodi huo ambao umeanza uzalishaji miaka ya karibuni,
unafikia ukomo miaka 6 ijayo kutokana na kasi ya uchimbaji, hivyo
akawataka wananchi kuiondoa CCM haraka madarakani, ili walau kuokoa
migodi kama Bulyag’hulu ambao bado una miaka 21 na ule wa almasi wa
Mwadui ambao umebakiza miaka 14.
“Kutokana na mikataba mibovu, sheria na sera mbovu za madini, tayari
kuna migodi mikubwa ambayo taifa limeanza kuachiwa mashimo na mfano
mzuri kabisa ni jirani tu hapo kwenye Mgodi wa Nzega uliokuwa chini ya
Kampuni ya Golden Pride, Mgodi wa Tulawaka, Biharamulo uliokuwa chini
ya African Barrick Gold. Kote huko tumeachiwa mashimo, wananchi na nchi
bado maskini, utajiri umeondoka,” alisema Mnyika.
Alibainisha pia kuwa umefika wakati ili kuyabana makampuni ya madini,
wafanyakazi wa migodini kuwa na nambari maalumu za mlipakodi (Tin),
ili mchango wao wa malipo ya serikali ubainike badala ya sasa ambapo
huingizwa kwenye kapu moja la malipo ya kampuni.
Chanzo;Tanzania Daima
0 comments:
Post a Comment