Waliochoma basi la mtei watiwa mbaroni

JESHI la polisi mkoa wa Singida linawashikilia watu 15  kwa tuhuma za kuchoma moto basi la kampuni ya Mtei, baada ya kuwagonga wapanda pikipiki na kusababisha vifo vya wanafamilia watatu.

Kamanda wa polisi Mkoa wa Singida Geofrey Kamwela amesema  kuwa watuhumiwa hao wanaendelea kuhojiwa kwa kosa la kulisababishia uharibifu basi hilo lenye namba  za usajili T 742 ACU aina  ya Scania lililokuwa likiendeshwa na Disma Ludovik kutoka Singida kwenda Arusha.

Baada ya kufika eneo la Januka nje kidogo ya Mji wa Singida Januari 09, mwaka huu, basi  hilo  liligonga  Pikipiki  yenye  namba T.368 BXZ Skygo, iliyokuwa imepakiwa watu wanne na kusababisha vifo vya watatu kati yao.

Kamanda Kamwela amesema baada ya wanafamilia hao kufa na baba yao mzazi aliyekuwa dereva wa pikipiki kulazwa Hospitali ya Haydomb Mbulu kwa matibabu hadi sasa, watuhumiwa walijichulia sheria mkononi kwa kuchoma basi hilo na kusababisha  hasara  ya zaidi ya shilingi milioni 70.

Kamanda Kamwela amesema watuhumiwa hao  15 akiwemo diwani wa kata ya  Unyambwa Shabani Satu  wanatarajiwa kupandishwa kizimbani wakati wowote kujibu shitaka linalowakabili.