KACU YAPATA VIONGOZI WAPYA

CHAMA Kikuu cha Ushirika wilayani Kahama Mkoa wa Shinyanga (KACU), kimepata viongozi wapya wa Bodi huku mjumbe mmoja akitaka kujivua madaraka hayo ya ujumbe baada ya kushindwa kwenye kinyang’anyiro cha kumpata Mwenyekiti wa Bodi ya ushirika huo.

Uchaguzi huo wa kuwapata wajumbe wa bodi ya Ushirika huo unaojumuisha vyama vya Msingi vya wakulima kutoka Wilaya za Kahama na Bukombe, ulifanyika juzi katika ukumbi wa Halmashauri ya Ushetu.

Dosari katika uchaguzi huo, ilijitokeza baada ya aliyekuwa Mwenyekiti wa KACU kwa miaka mitatu, Said Tangawizi, kushindwa kutetea nafasi hiyo na kuomba kujiengua ili kumpa fursa Mwenyekiti mpya kufanya kazi kwa kujiamini.

Tangawizi aliyepata ujumbe kupitia Wilaya ya Bukombe, aliingia katika kinyang’anyiro cha kutetea nafasi yake ya Uenyekiti lakini alishindwa kwa kura tatu na Makamu Mwenyekiti wake, Emmanuel Cherahani, ndipo aliposimama wakati wajumbe wakiendelea na zoezi la upigaji kura nafasi nyingine na kudai anajiuzuru ujumbe wa Bodi.

“Nakiri kushindwa na ninampongeza aliyekuwa Makamu wangu kunibwaga, na ili kumpa nafasi ya kujitanua katika utekelezaji wa majukumu yake, ni vyema nikajiuzuru ujumbe nilionao ili isije tokea akashindwa kufanya kazi kwa ufanisi kwa ajili yangu,” alisema Tangawizi.

Hata hivyo, Mwakilishi wa Mrajis kutoka Dodoma, Moshi Chogero, alipinga uamuzi huo kwa maelezo unakwenda kinyume cha kanuni na taratibu za chaguzi za vyama vya Ushirika nchini.

Aidha, Chogero aliwaasa viongozi waliochaguliwa kuwa waadilifu kwa mali za Ushirika, kwa kuhakikisha wanaepuka kuuingiza Ushirika katika hasara na kuondoa hasara zilizokwishapatikana sambamba na kuwachukulia hatua ikiwemo kuwafilisi mali zao waliokwishafanya ufisadi ndani ya Ushirika.

Katika uchaguzi huo, wajumbe waliochaguliwa kutoka Wilaya za Mbogwe na Bukombe ni Yilagela Chabili (Makamu Mwenyekiti), huku wajumbe ni Wales Bundala na Said Tangawizi wakati kutoka Ushetu na Kahama ni Seslia Maligo, Paul Lugomya na Geofrey Mondo.

Wajumbe waliochaguliwa kuuwakilisha ushirika huo katika vikao vya Apex ni pamoja na Mwenyekiti wa Ushirika huo, Cherahani na Wales Bundala huku kutoka nje ya Bodi ni Rashid Ally Hamis.

  Chanzo:Tanzania Daima

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.